O máis importante

Preparad@s para o segundo desafío?

Moi bos días, compañeiros do pasado. Sígovos agradecendo moitísimo que me salvarades a vida. A pesar de que o lume xa está apagado, sigo metido no cole porque aínda vexo toda a zona queimada, así que supoño que aínda non resolvestes o problema. Estou seguro de que aquí no colexio atoparemos algunha solución, xa veredes, así que seguirei aquí un tempo axudándovos no que poida.

De momento atopei unha nova pista, e de novo penso que só vós a podedes resolver. Leva por título "O máis importante", non sei a que se refire, pero sen dúbida vainos ser de gran axuda. Tamén hai unha foto dunha nena.

Envíovos ás pistas á fotocopiadora, cando averigüedes que é o máis importante, pulsade na imaxe e escribide a palabra.

Grazas infinitas!

 Moitas grazas, rapaces! Salvástesme a vida! Supoño que estariades impacientes por saber de min, estoi moi ben, só estiven moi ocupado tratando de resolver o enigma de como evitar o gran incendio do meu tempo. Aínda non din coa solución, pero xa estou máis preto, seguídevos preparando cos profes, porque necesitaredes todo o coñecemento que poidades aprender.

Moi pronto teredes o segundo desafío, así que seguide atentos ó blogue, porque mañá ou pasado dareivos instruccións por aquí.

Emerxencia!

O voso último brindo foi moi bo, pero non é tan sinxelo exlicarvos como se pode evitar un gran incendio. Vaivos levar un tempo comprendelo todo, así que tede paciencia e confiade nos vosos profes, que saben moito. Veredes como todo vai sair ben.

Ademais, necesito a vosa axuda urxentemente! Parece que o lume do meu tempo non está apagado de todo e diríxese cara o colexio, onde estou refuxiado. Non lembro o número de emerxencias e só atopei unhas pistas que non podo resolver, teredes que facelo vós e marcalo dende aí, non hai tempo a máis.

Se me salvades a vida teremos máis tempo para que evitedes que o lume se estenda tanto dende o principio.

Preme na imaxe para acceder ós sistemas de chamada

Enviei as pistas á fotocopiadora do voso tempo, moita sorte e espero podervos mandar pronto outra mensaxe.

Primeiro desafío

 Estades listos para o voso primeiro desafío? Teredes que colaborar entre todos e usar todos os vosos coñecementos para conseguilo.

Mañá mesmo vos darei instruccións a esta hora. De momento só vos podo dar unha pista: DIVIDE E VENCERÁS!!

 

O voso brindo de onte foi moi bo. Vedes o que podedes chegar a facer? É incrible do que sodes capaces.

Pero un sempre pode mellorar, así que prestade moita atención hoxe á vosa amiga Sara Marchena!

Que ricas cereixas!

 Ola amigos, que ricas están as cereixas das cerdeiras que plantastes onte! E como se agradecen as sombras na festa de Vilar! Que como o sei? Lembrade que eu vivo no Courel do futuro, así que o que vós facedes no voso tempo, inflúe directamente no meu.

É por iso que vos contactei, eu e os habitantes do Courel do meu tempo precisamos a vosa axuda. Sabedes por que me escondín xunto coas miñas cousas no terceiro piso do cole? Porque houbo un gran incendio no que ardeu todo o Courel e o cole foi o único sitio seguro que atopei e o único que se salvou das chamas.

Que podedes facer vós para evitalo? Eu seino porque coñezo o que pasou no voso tempo e despois, pero é moi complexo explicalo todo agora, teredes que resolver moitas probas e acertixos para os que necesitaredes coñecementos que aínda non tedes. O mellor consello que vos podo dar é que atendades e aproveitedes as clases co profe Rubén e cos demais mestres, así aprenderedes todo o necesario para levar a cabo a vosa misión pasiño a pasiño. Podedes confiar totalmente neles.

Contareivos máis cousas moi pronto e, se queredes mandarme algunha mensaxe, podedélo facer escribindo un brindo e cantándoo todos xuntos. Porque, si, na nosa época coñecemos os brindos do Courel grazas a que vós non os deixastes desaparecer e, aínda que vos sone raro, a maxia da música e capaz de levar as mensaxes a través do tempo, ou vós nunca escoitastes música de moitos anos atrás?

Saúdos dende o futuro!

Se chegaches ata aquí significa que eres unha persoa moi espelida. Se ademais eres alumno/a de primaria no colexio do Courel, entón teño que dicirche que sodes moi especiais e que necesito da vosa axuda. Se es do grupo dos máis pequenos creo que isto xa o sabedes e tamén que chegaredes a facer grandes cousas traballando en equipo e axudándovos mutuamente.

Soanvos de algo estas palabras? Si, era eu o que vos contaba esas historias dende o futuro a través de Chatgpt, pero esa intelixencia artificial cada vez é máis lista e difícil de hackear, así que a partir de agora comunicareime por este blog.

Pero, quen son eu? Onde estou? Que podedes facer para axudarme? Como chegaredes a saber a verdade sobre a vosa existencia? Por que sodes tan especiais? Son moitas cousas para responder de golpe e o wifi do futuro non conecta moi ben co do pasado. Non teño tempo a escribir máis agora mesmo, pero tranquilos, de momento só necesito que vaiades a plantar árbores a Vilar o antes posible, incluso hoxe mesmo!

Permanecede atentos e moi pronto teredes máis noticias miñas.